Predsjedništvo Hrišćansko-demokratske unije (CDU) je ponovo podržalo svog predsjednika Armina Lašeta u kandidaturi za demohrišćanskog kandidata za kancelara na parlamentarnim izborima u septembru, javljaju agencije.

Članovi saveznog predsjedništva CDU-a su u utorak rano ujutro, nakon šestosatnog sastanka, sa 77,5 posto glasova podržali Lašeta.

Od 46 članova predsjedništva, 31 član je birao Lašeta, devet Zedera a šest se suzdržalo od glasanja.

Lašetovog konkurenta Markusa Zedera, predsjednika Hrišćansko-socijalne unije (CSU), manje stranke demohrišćanske Unije CDU/CSU, podržalo je 22,5 odsto članova predsjedništva CDU-a.

Nakon što su preko vikenda propali pokušaji dogovora dvojice predsjednika stranaka Unije CDU/CSU Lašeta i Zedera o tome koji će od njih dvojice preuzeti ulogu kancelarskog kandidata, Zeder je u ponedjeljak najavio kako odluka o kancelarskom kandidatu zavisi od toga šta odluči predsjedništvo CDU-a, veće od dviju stranaka Unije.

“Ako predsjedništvo CDU-a večeras jasno podrži Lašeta, mi ćemo poštovati tu odluku”, rekao je Zeder u ponedjeljak poslijepodne nakon sastanka predsjedništva CSU-a. On tom prilikom nije rekao što smatra “jasnom podrškom”.

Kandidaturu Lašeta mora još potvrditi i vođstvo CSU-a.

Merkel se povlači iz politike

Zeder je proteklih dana istrajao na kandidaturi pozivajući se na bolje rezultate u ispitivanjima javnog mnijenja kako kod birača generalno, tako i kod glasača Unije CDU/CSU.

Lašet je, kako javljaju agencije pozivajući se na učesnike onlajn sastanka predsjedništva, rekao kako je noćašnji izbor “važan signal” u procesu konačnog izbora kancelarskog kandidata Unije i mogućeg nasljednika kancelarke Angele Merkel koja se nakon aktualnog mandata povlači iz politike.

U istoriji Unije CDU/CSU samo su dva političara iz CSU-a, Franz Josef Štraus i Edmund Štojber, ušla u predizbornu trku kao kancelarski kandidati.

CSU zastupa demohrišćansku opciju u Bavarskoj, a CDU u ostalih 15 njemačkih saveznih pokrajina.